Sanator-kurort yollayışları

• Əlilliyi olan şəxslər (işləyən əlilliyi olan şəxslər, istehsalatda bədbəxt hadisələr və peşə xəstəlikləri nəticəsində əlilliyi olan şəxslər və "Əmək pensiyaları haqqında" Qanuna uyğun olaraq əlilliyə görə pensiya almaq hüququ olan hərbi qulluqçular istisna olmaqla);
• İkinci Dünya müharibəsi iştirakçıları;
• Şəhid ailələri;
• Çernobıl AES-də qəzanın nəticələrinin köçürmə zonasında ləğv edilməsinin iştirakçıları, eləcə də köçürülmə günü ana bətnində olan uşaqlar da daxil olmaqla, uzaqlaşdırma və köçürmə zonalarından köçürülmüş uşaqları, habelə 1986-cı il aprelin 26-dan sonra doğulmuş və Çernobıl AES-də qəzanın nəticələrinin ləğv edilməsinin iştirakçısı olmuş yaxud Çernobıl qəzası nəticəsində zərər çəkmiş və birbaşa radioaktiv şüalanmaya məruz qalmaq ehtimalı olmuş valideynlərin birindən olan uşaqlar;
• Valideynlərini itirmiş və valideyn himayəsindən məhrum olmuş uşaqlar;
• Fövqəladə hallarda insanların xilas edilməsində və tibbi yardım göstərilməsində iştirak edərkən ziyan çəkmiş vətəndaşlar.

Vətəndaş regionlarda sanatoriya-kurort putyovkası ilə təmin olunmaq məqsədilə növbəyə alınmaq üçün Nazirliyin tabeliyində Dövlət Tibbi Sığorta və Ekspertiza Agentliyinin yerli filiallarının sanatoriya-kurort arayışına əsasən Nazirliyin tabeliyində Sosial Xidmətlər Agentliyinin qeydiyyatda olduğu ünvan üzrə müvafiq regional filialına müraciət edir.

Vətəndaş Bakı şəhərində sanatoriya-kurort putyovkası ilə təmin olunmaq məqsədilə növbəyə alınmaq üçün Nazirliyin tabeliyində Dövlət Tibbi Sığorta və Ekspertiza Agentliyinin yerli filiallarının sanatoriya-kurort arayışına əsasən Nazirliyin tabeliyində Dayanıqlı və Operativ Sosial Təminat Agentliyinin qeydiyyatda olduğu ünvan üzrə müvafiq DOST mərkəzinə müraciət edir.