Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti Dünya Bankı ilə Azərbaycan hökuməti arasında imzalanacaq müqaviləyə əsasən həyata keçiriləcək “Azərbaycanda məşğulluğa dəstək layihəsi” barədə maarifləndirmə tədbirlərinə başlayıb.
Tədbirlərə rayon (şəhər) Məşğulluq mərkəzlərində qeydiyyatda olan və özünüməşğulluq proqramına müraciət etmək istəyən işaxtaran və işsiz vətəndaşlar cəlb edilir. İlk belə tədbir Bakı, Sumqayıt, Quba, Qusar və Xaçmazdan olan vətəndaşlar üçün keçirilib.
İştirakçılara layihənin özünüməşğulluq proqramına verəcəyi dəstək, layihəyə cəlb edilənlərin vəzifələri, Dünya Bankının bu layihə üzrə standartları və s. barədə məlumat verilib. Qeyd edilib ki, layihənin məqsədi həssas əhali qruplarının özünüməşğulluğunu və bu əsasda əmək bazarına daxil olmasını, sahibkarlığa çıxışını dəstəkləmək, müstəqil surətdə gəlir əldə etmək imkanlarına malik olmalarına şərait yaratmaqdır.
Maarifləndirmə tədbirlərinin digər rayonlarda keçirilməsi planlaşdırılır.
Sosial şəbəkələrdə də bizi izləyin:
